Landgræðsla, skógrækt og náttúruvernd eru Vigdísi afar hugleikin og hefur hún veitt þessum málefnum ómetanlegan stuðning. Hún hefur vakið athygli á uppeldislegu gildi þess að kenna börnum ræktun og að vernda náttúruna.  Æska landsins öðlist þannig virðingu fyrir landinu og finni til ábyrgðar í umgengni við náttúruna. Í forsetatíð sinni lagði Vigdís mikla áherslu á að græða upp landið og gróðursetja tré. Hún hefur líkt jarðyrkju við uppeldi barna og sagt að ræktun landsins sé nátengd mannyrkju.  

„Þeim fjölgar stöðugt sem gera sér ljóst að landið sem við tókum í arf á kröfu til þess að við ræktum það og varðveitum, færum því aftur þann gróður sem það hefur misst, og beitum til þess allri þekkingu og öllu því hugviti sem við eigum. Þannig gjöldum við landskuld okkar við alnar og óbornar kynslóðir. Vel kann það að vera dómur okkar að liðnar kynslóðir hafi stundum gengið nær landinu en hollast hefði verið en við hljótum líka að geta skilið að þær áttu ekki annarra kosta völ. Þá afsökun eigum við ekki og arftakar okkar munu ekki fyrirgefa okkur á þeim forsendum. Því við eigum að vita hvað við erum að gera, þekkja bæði land okkar og fiskimið, kosti þeirra og þol.“ Innsetningarræða 1988

Í forsetatíð Vigdísar árið 1990 stofnaði Skógræktarfélag Íslands, henni til heiðurs og gleði, Vinaskóg í landi Kárastaða, í nágrenni Þingvalla, og er honum ætlað að minna á mikilvægi vináttu og friðar meðal manna. Þangað hafa komið heimsþekktir gestir og gróðursett tré, þeirra á meðal fjölmargir þjóðhöfðingjar og fulltrúar erlendra ríkja og alþjóðlegra stofnana.

Vigdís er verndari Landverndar. Í júní 2005 kom stjórn samtakanna saman í Alviðru til að gróðursetja 75 bjarkir sem nú mynda Vigdísarrjóður. Rjóðrið á að vera skjól þeim börnum sem í framtíðinni munu sækja fræðslu og útvist í Alviðru. Gróðursetningin var afmæliskveðja samtakanna til Vigdísar.