Athygli vakti um gjörvallan heim þegar kona var í fyrsta sinn kjörin leiðtogi þjóðar sinnar í lýðræðislegri kosningu. Óhætt er að segja að sögulegt kjör Vigdísar Finnbogadóttur 29. júní 1980 og farsælt starf hennar jafnt heima sem heiman hafi reynst ein besta landkynning sem íslenska þjóðin hefur fengið síðan hún lýðveldi var stofnað 17. júní 1944. Á sextán ára forsetaferli tók Vigdís ekki aðeins á móti þjóðhöfðingjum og öðrum erlendum leiðtogum á Bessastöðum heldur líka mörgum yngri og eldri Íslendingum sem eru minnisstæðir fundir með forsetanum. Í heimsóknum til annarra landa hefur Vigdís ætíð vakið athygli á Íslandi, náttúru landsins og tungu og menningu þjóðarinnar. Þá eru lýðræði og jafnréttismál ásamt mikilvægi fjölbreytileika menningar og tungumála henni jafnan hugleikin. Eftir að Vigdís lét af embætti forseta árið 1996 hefur hún unnið ötullega að þessum hugðarefnum sínum, hér heima og á alþjóðavettvangi. Hún hefur gegnt fjölmörgum trúnaðarstörfum og verið verndari góðra málefna.

Þrátt fyrir að 13 ár séu liðin síðan Vigdís lét af embætti berast sífellt fyrirspurnir víða að um störf hennar og hugðarefni. Síðastliðið vor fór utanríkisráðherra þess því á leit við Stofnun Vigdísar Finnbogadóttur í erlendum tungumálum að gerður yrði vefur um líf Vigdísar og störf. Verkefnið er kostað af ríkisstjórn Íslands. Eðli málsins samkvæmt er megináhersla lögð á forsetatíð Vigdísar, en jafnframt er leitast við að varpa ljósi á þau verkefni, sem Vigdís helgar krafta sína um þessar mundir. Vefsíðurnar birtast hér á íslensku, en efni þeirra verður á næstunni þýtt á opinberar tungur Sameinuðu þjóðanna.

Vefurinn er ekki endanlegur, hér er stofn að tré sem á eftir að teygja greinar sínar lengra og hærra. Allar góðar ábendingar og upplýsingar eru vel þegnar og óskast þær sendar á netfangið info@vigdis.is.